Psalmen 8 : 1-10 Thema: “Debatanta Marmulia Jala Sangap”

 

Minggu, 12 JUNI 2022

TRINITATIS

Jamita:

Psalmen 8 : 1-10

Thema: “Debatanta Marmulia Jala Sangap”

Oleh: St. PB Pakpahan,S.Pd

 

Syalom…..!!!

Damang dainang Huria ni Tuhan!!

Ia turpuk jamita diminggunta sadarion ima sian Psalmen 8 : 1-10, songononma didok, jala tangkas ma tapaihut-ihut………………

 

Damang dainang Huria ni Tuhan ta!!

Hita tanda do rumang ni Jajowa?

Ise do jolma?

Songon dia do Pasangab Jahowa?

 

Damang dainang, na niasian ni Jesus Kristus,

Songon dia do hita mananda hinabalga ni Jahowa, songon dia dohita mananda Huaso ni Jahowa?

Tontu na ingkon idaonta ma angka najinadihon ni tanganna.

Alani do didok si Daud, di ay 4:Molo hutailihon langitmi, angka jadijadian ni jarijarim, bulan dohot bintang, angka na pinaulim.

Molo taida video napendek perbandingan ni jolma dohot angka saluhut  jadi-jadian ni Jahowa :  Dung taida luhutna i Ise do manjadihon i??

 

Ima na ni ida ni si Daut, gabe didok ma tung aha ma jolma i? Umbahen pola ditaringoti roha ni Jahowa hita,

Jala tung aha ma  anak ni jolma i? Umbahen pola di ebati Jahowa Debata hita??

Songon orbuk do hita jolma maradophon angka hasiangan on, dang pola adong dohonon impola na, lea idaon, jala sahera dang adong panghorhon na idaon.

Alai

ü Sian orbuk ido dijadihon Jahowa jadi-jadianna, nalaho mangarajai na tinompa nai, nalaho mambahen goar ni natinompa na i.

ü Sian orbuk najinadihon ni tangan na i do, gabe hasandaran ni Jahowa.

ü Sian orbuk ido di tompa Jahowa jolma i {1 Musa 1:26-27; 26 Dung i mangkuling muse ma Debata: Tole ma, itatompa ma jolma, tumiru rupanta, tudos tu pangalahonta, asa dirajai dengke angka na di laut, dohot pidong angka na martongatonga langit, dohot angka dorbia, ro di sandok tano on nang sude gulokgulok, angka na manjirir di atas tano on.
27 Jadi ditompa Debata ma jolma i tumiru rupana, rupana ditiruanhon Debata laho manompa ibana, baoa dohot boruboru nasida ditompa}.

Marhite ima si Daut mandok , ay 6.Humurang apala otik do Jolma i sian Debata dibahen, jala dang holan ditompa songoni, ditalitalihon Johowa hamuliaon (hasandaran ni Tondi na) dohot hatongamon, na gabe marimbar situtu sian angka jadi-jadian na asing.

 

Damang-dainang Huria ni Tuhanta,

Naeng do rohanta marnida Jahowa? Tabereng ma jolma na dilambungta, ai ditompa Jahowa jolma na dilambungta i, rupa ni Jahowa do hape na diparrupahon tu na dilambung ta i.

 

Alai sega mai rupa na uli i, songon gombaran nadenggan hape sabur ma tinta na birong tu atas na gabe humurang ma gombaran i, jala dang adong be nilai na,  tarsongonido rupanta on nuaeng, use ma dosa i gabe humurang ma hita di adopan ni Debata.

 

Dosa, hadosaon, haleaon, haramunon, hajahaton, pangiburuon, pargalambuson, dohot ragam pemberotakan tu Jahowa i ma na taula, gabe lam sega ma bohi ni Jahowa na di hita i.

Gabe ullea sian orbuk nangkin, dang sangap be jolma i, mago ma hamuliaon ni Jahowa Tuhan i sian pamatang ni Jolma i.

 

Damang-dainang Huria na niasian ni Jahowa Tuhan i.

Dang dipasombu hita mago songoni, dang dipasombu hita songon orbuk na diullus ni alogoa habang tanpa arah dan tujuan ala ni hagaleonta. Sian hagaleonta di tangihon Jahowa do angguk-angguk ta, ay 3;Gari sian pamangan ni angka dakdanak dohot angka posoposo dijadihon Ho do paranganmu; hata dakdanak dohot poso-poso manggombarhon hagaleon dohot toruk ni roha, lapatanna angka jolma na gale dohot na martoruk ni roha dipargogoi Jahowa Debata laho manaluhon musu dohot sitahi sudol-sudol (pendemdam), ima angka ginjang ni roha, angka napatujolo diri, angka naso mamuji Debata (1 Korint 1:27, Alai na oto di roha ni portibi on dipillit Debata, laho pailahon angka na bisuk; jala na gale di portibi on dipillit Debata, laho pailahon na gogo).

Jadi dang marguna angka parroha siginjang roha, angka sitahi sudol-sudol, angka sitahi naso hasea ai rimpashonon ni Tuhan i do i.

Alai molo martorup niroha songon poso-poso naso umboto agia aha, ido dipabangkit Jahowa Debata manaluhon siginjang roha i.

 

Damang-dainang Huria ni Tuhanta,

Diholong ni roha ni Jahowa tu hita jolma ro do Jahowa  tu portibion asa boi hita pajumpang, manghatai, marsijalangan, padompak-dompak, ima marhite daging ni jolma ima Jesus. Turun sian hasangapon  na i, gabe marsangap orbuk ima jolma na dijinadihon nai gabe inganan hasandaran ni Tondi Na ima Tondi Parbadia, marnida habolonon ni Jahowa i na manompa saluhut angka hasiangan on, sahat tu holong i rohana tu orbuk ima jolma na marlea i ala ni dosa, gabe tama jala mararga di adopan ni Tuhan i, patut do hita

Marsomba, jala mandok Jahowa Debatatta Marmulia jala Sangap.

Songon dia do hita mangulahon pandohan di ay 10. Ale Jahowa, Sigomgom hami, mansai sangap do goarmu di liat portibi on.

Pasangap Debata na songon dia do nidokna?

Ø      holan marhite ende do?

Ø      holan marhite tangiang do?

Ø      holan marhite parmingguon do?

Ø      holan marhite pelean hamuliateon do?

Pasangap Debata na didokna ima:

songon  pandohan ni Ireneus di abad pertama. Didok: Gloria Dei, vivens Homo. Lapatanna: Marmulia do Jahowa molo jolma mangolu songon jolma ( Allah dimuliakan ketika manusia hidup sebagai manusia).

Hita jadijadian ni Debata na leaon, alai arga do hita jala sangap dibahen Jahowa.

Manat ma hita amang inang maradophon dongan ta jolma, ditikki taleai, tajongkali, tajahati dongan jolma, ditikki ima hita berurusan dohot Jahowa na manjadihon sa, jala laos ditikki ima hita patutoru sangap ni Jahowa.

Molo sangap do dongan jolma tabahen, tabaju-baju i naso adong baju-baju na, asa rap sangap hita, ta lehon mangan naso mangan i, asa rap bosuran hita, nungnga taberlakuhon be jolma i songon jolma secara manusiawi. Molo ido taulahon nunga pasangap Jahowa Tuhan i hita.

Manjadi ma pandohan Gloria Dei, vivens Homo: Marmulia do Jahowa molo jolma mangolu songon jolma.

 

Amen.